Pagkatapos sang kapin apat ka dekada sa serbisyo publiko, naghatag sang panan-aw si anay Iloilo City Mayor Jerry Treñas kun paano siya subong sa pribado nga kabuhi kag sa padayon nga isyu sa lokal nga politika.
PRIVATE LIFE AFTER PUBLIC SERVICE
Suno kay anay Mayor Treñas sa interview sang Bombo Radyo, mas nagahimakas siya subong sa personal nga oras. Iya ginpakigbahin nga nasadyahan siya kag may tsansa na siya nga maka-upod niya ang mga suod nga abyan nga madugay na niya nga wala nakaupod, bisan sa simple nga pangape-kape. Ginbunyag man sini nga may pila ka imbitasyon siya nga nabaton para magtudlo bilang professor sa Political Law. May posibilidad man nga mabalik siya sa iya law office bilang corporate lawyer, kung sa diin naga-handle siya sang mga civil cases. Ginpahayag niya nga kapin 40 ka tuig ang iya total nga serbisyo sa gobyerno kag subong, mas madamo na siya sang tulog.
ON RAISA TREÑAS AND POLITICAL OPPOSITION
Ginpahayag man ni Treñas nga bisan bag-uhanon ang iya anak nga si Raisa sa politika, dugay na ini nga naga-upod sa iya sa mga buluhaton. Ginpahayag niya nga si Raisa ang nagsilbi bilang iya Chief of Staff halin pa sang iya pagpungko bilang konsehal tubtob congressman. Suno pa sa iya, natural na nga may oposisyon sa politika, kag sa 40 ka tuig niya nga serbisyo, lakip na ang kampo ni Congresswoman Jamjam Baronda, Vice Mayor Love Baronda, kag anay Mayor Jed Patrick Mabilog. Gin-ako ni Treñas nga indi gid malikawan ang kritisismo sa politika kag dapat lang nga ginakabig ini nga bahin sang serbisyo.
CITY HALL SPACE ISSUE
Ginpat-od man ni Treñas nga suno sa Local Government Code, may gahum ang alkalde sa pag-assign sang espasyo sa sulod sang City Hall para sa mga opisina sang LGU. Ginpanugyan niya nga kinahanglan ang mga bag-o nga opisyales nga magsunod sa seminar nga ginasuporta sang DILG agud mas mangin epektibo sa ila papel.
FLOODING ISSUE
Sa isyu sang pagbaha sa siyudad ilabi na sa Jaro. Ginpunto sini nga indi si Raisa ang nagareklamo kundi ang mga pumuluyo mismo. Suno kay Treñas, dapat tutukan sang DENR kag DPWH ang problema ilabi na kon apektado na ang seguridad sang publiko, kag may responsibilidad ang LGU nga magpasiguro ang ‘safety’ sang tanan.
REAL PROPERTY TAX
Ginpahanumdom man ni Treñas nga sa panahon sang administrasyon ni President Duterte, ginsuguran ang implementasyon sang Mandanas Ruling nga naga-apekto sa real property tax kag iban pa nga revenue sharing sa mga LGU.
2028 COMEBACK POSSIBILITY
Sa katapusan, ginbuyagyag ni anay Mayor Treñas nga posible siya magabalik sa politika sa 2028 nga eleksyon, apang subong nagakabuhi siya sing malinong kag pribado kaupod ang pamilya kag mga abyan.
