Indi na makadalagan sa pagka-Presidente sa 2028 si Vice President Sara Duterte kon ma-convict siya sa impeachment case, bangod mahimo ini magresulta sa perpetual disqualification sa paghawid sang posisyon sa gobyerno.
Sa interview sang Bombo Radyo kay Atty. Jeremy Moreno, professor sa University of San Agustin, College of Law, iya ginpaathag nga magluwas sa removal bilang bise presidente, may accessory penalty man nga mahimo magresulta sa perpetual disqualification from holding public office kon ma-convict sa impeachment court.
Suno kay Atty. Moreno, ini ang isa sa pinakaimportante nga epekto nga dapat bantayan bangod mahimo ini makaapekto diretso sa plano ni Duterte nga magpadalagan sa pagka-Presidente sa 2028.
Samtang, posible man suno sa iya nga mag-atubang pa si Duterte sang iban nga criminal cases, lakip ang posible nga graft and corruption, malversation kag iban pa nga paglapas sa special penal laws, nga may kaangtanan sa mga alegasyon nga ginpresentar sa impeachment court.
Pahayag man sang abogado, ang pila sa sini nga mga kaso mahimo man magdala sang perpetual ukon temporal disqualification from holding public office, depende sa kaso kag sa penalty nga idagdag kay VP Duterte.
Ginpahayag man niya mahimo man ini makaapekto sa viability ni Duterte bilang kandidato sa 2028, depende sa pag-uswag kag resulta sang mga kaso nga mahimo niya atubangon.
Apang ginpunto ni Moreno nga sa subong, ang una nga dapat bantayan amo ang resulta sang impeachment case, samtang posible man nga may mga criminal cases pa nga mapasaka sa Department of Justice batok sa Vice President.
