Ginpakigbahin ni Police Captain Val Cambel, hepe sang Iloilo City Police Station 10, sa interview sa Bombo Radyo nga ipaidalum sa autopsy investigation ang bangkay sang isa ka pulis nga nasapwan nga nagalutaw sa Iloilo River sa may Esplanade 1, sakop sang Barangay San Rafael, Mandurriao, Iloilo City.
Suno sa iya, bag-o lang sila nakig-angut sa pamilya sang biktima matapos nila nahibaluan nga ang pulis halin sa Negros Oriental.
May pila pa sila ka butang nga ginadiskusyonan upod sa pamilya, kag ginakumpleto ang impormasyon parte sa biktima.
Ginpahayag man ni Cambel nga ila ginapreparar ang coordination sa unit kun diin ini nga pulis sang una na-assign, agud mas mapaathag pa ang background kag mga posible nga rason sang insidente.
