Paimbestigaran sang Iloilo City Government ang duha ka estudyante nga nakuhaan sang video nga nagapakighilawas sa Esplanade 11 sa Barangay Progreso, Lapuz, Iloilo City.
Babaye kag lalaki ang yara sa video nga nagahimo sang malaswa nga buluhaton. Naglapta ang amo nga video kag ginapyestahan subong sa social media.
Sa interview sang Bombo Radyo Iloilo kay Engineer Neil Ravena, head sang General Services Office (GSO), iya ginpahayag nga bisan wala pa naturn-over sang Department of Public Works and Highways (DPWH) Region 6 sa Iloilo City Government ang Esplanade 11, magahimo sila sang mga tikang agud malikawan nga masulit ang nasambit nga insidente.
Ginpahayag man niya nga nagkoordinar na siya kay Public Order and Safety Management Office (POSMO) head Retired Colonel Uldarico Garbanzos agud mapalig-on ang seguridad sa area samtang wala pa naturn-over ang Esplanade sa siyudad.
Dugang pa ni Ravena, makoordinar man sila sa barangay para sa posible nga pagdeploy sang mga barangay tanod agud mapadamo ang presensya sang mga nagabantay sa lugar.
Sa tion nga ma-turn over na ang Esplanade, mahimo na nga magadeploy ang natungdan sang regular nga mga green guard nga maga-duty sa lugar bilang kabahin sang tikang sa pagmintinar sang seguridad kag kaayuhan sang publiko.
Nauna naman nga napahibalo sa Iloilo City Police Office ang amo nga insidente kun sa diin may imbestigasyon naman nga ginapatigayon.# -By: Bombo Cyrene Nasis
