Ginbasura ni Sen. Francis Escudero ang panawagan sang mga student groups kag mga kritiko nga mag-inhibit ini sa impeachment trial ni Vice President Sara Duterte.
Ginpahayag ni Escudero nga indi patas ang hingyo sang mga kritiko kun ang buot silingon lamang sang “katarungan” amo ang pagpasugot sa ila ginapangayo.
Matandaan nga nagpadala sang sulat ang mga student leaders gikan sa 24 ka mga unibersidad sa opisina sang Senate President kag nagapanawagan nga magbiya ini bilang presiding officer sang impeachment trial.
Suno sa ila, ang pagka-delay sang proseso ang nagapakita sang pagdampig ni Escudero kag amat-amat nga pagkaguba sang kredibilidad sang Senado.
Kalakip sa mga nagpirma sa sulat ang mga estudyante sang University of the Philippines, Ateneo de Manila University, De La Salle University, Adamson University, Bulacan State University, kag iba pa.
Ginpanginwala man ni Escudero ang akusasyon nga ginahungod sang Senado ang pagka-delay sang impeachment proceedings.
