Nagbaskog pa ang Bagyo Emong kag nahimo na nga Severe Tropical Storm samtang yara sa sulod sang Philippine Area of Responsibility (PAR).
Ulihi ini nga nakit-an sa kalayuon nga 245 kilometros nakatundan sang Bacnotan, La Union.
Dala sini ang kabaskugon sang hangin nga 110 km/h malapit sa sentro kag pagmadlos nga tubtub sa 135 km/h. Nagahulag ini sa direksyon nga pa-nabagatnan-nakatundan sa kadasigon nga 25 km/h.
Napaidalom na sa Signal Number 3 ang northern portion sang Pangasinan kag ang western portion sang La Union.
Sa pihak nga bahin, nabatak naman sa Signal Number 2 ang areas sa Luzon kaangay sang Ilocos Norte, Ilocos Sur, nabilin nga bahin sang La Union, ang western portion sang Apayao, Abra, Kalinga, Mountain Province, Ifugao, Benguet, ang central portion sang Pangasinan, kag ang western portion sang Nueva Vizcaya.
Nagapabilin naman sa Signal no. 1 ang Batanes, Cagayan lakip na ang Babuyan Islands, ang western kag ang central portions sang Isabela, nabilin nga bahin sang Nueva Vizcaya, Quirino, nabilin nga bahin sang Apayao, nabilin nga bahin sang Pangasinan, ang northern kag central portions sang Zambales, Tarlac, kag ang western kag central portions sang Nueva Ecija.
Sa track forecast, ginalantaw nga magahulag si Emong sa direksyon nga pa-nakatundan nasidlangan antes magliso pa-naaminhan-nasidlangan sa masunod nga 24 oras.
Mahimo ini maglabay malapit sa Pangasinan karon sa hapon kag mag-landfall sa Ilocos Region karon sa gab-i ukon sa buwas sa aga.
Nagbaskog ini sa severe tropical storm 2:00 AM kaina sang kaagahon, kag posible mahimo nga typhoon antes ang landfall sini sa Ilocos.
Sa pihak nga bahin, padayon nga gina-monitor ang Tropical Storm “DANTE” sa sulod sang PAR, apang sa latest weather bulletin, wala na sang areas nga napaidalom nga areas sa wind signal bangud sa sini nga bagyo.
Magluwas sa sini, sa latest weather bulletin, ang isa ka Low Pressure Area (LPA) sa guwa sang PAR ang may yara sang mataas nga potensyal nga mag-develop sa tropical depression sa masunod nga 24-oras.
