Text by: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
Isa ka menor de edad ang napatay matapos nalumos sa suba sa Brgy. Cabudian, Dueñas, Iloilo sang udto, Hulyo 27.
Ang biktima amo si alyas Justin, 16-anyos, residente man sang nasambit nga barangay.
Sa interview sang Bombo Radyo kay Police Corporal Jess L. Navigar, imbestigador sang Dueñas Municipal Police Station, iya ginpahayag nga pasado alas-12 sang udto sang nagkadto sa suba si Justin kaupod ang walo niya ka abyan agud magpaligo.
Samtang nagalangoy, nagkadto si Justin sa madalom nga parte sang suba nga ginabulubanta may kadalumon nga 12-20ft.
Gintinguhaan pa sang iya mga abyan nga salbaron siya apang tungod sa makusog nga daludo sang tubig, nabudlayan sila nga luwason ini.
Ginpatigayon gilayon sang Municipal Disaster Risk Reduction and Management Office (MDRRMO) sang Dueñas, kaupod ang Bureau of Fire Protection ang search and rescue operation.
Suno kay PCpl. Navigar, pasado alas-2:50 sang hapon, nasapwan ang lawas sang biktima malapit lang sa parte nga ila ginlangoyan.
Nakit-an nga naglutaw na ini sa ibabaw sang tubig.
Gindala gilayon si Justin sa pinakamalapit nga ospital, apang gindeklarar siya nga dead on arrival sang attending physician.
Nahibaluan man nga ang lugar sang insidente ang anay quarry site rason nga may madalom nga parte ang suba nga delikado sa mga nagakapaligo.
