Ginahingyo subong sang publiko ang pagresponde sa isa ka ginbakbak nga karsada sa JM Basa Street bangud sa kakulangan sang early warning device (EWD) kag klaro nga traffic rerouting.
Sa interview sang Bombo Radyo kay Joy Fantilaga-Gorzal, tagpamaba ni Mayor Raisa Treñas, iya ginpahayag nga tungod sa Facebook post sang Bombo Radyo kag mga reklamo sang concerned nga netizens, gilayon niya ini ginpaabot kay Mayor Raisa.
Suno kay Fantilaga-Gorzal, nakita sang alkalde ang posibilidad sang disgrasya sa lugar, gani gilayon nga ginmando ni Mayor Raisa Treñas nga ipa-review kag ipa-inspect sang City Engineer’s Office ang proyekto, upod ang iban pa nga mga ongoing projects sa siyudad.
Ginpahanumdom man sang alkalde nga kinahanglan may early warning device ang tanan nga proyekto kag kontrata nga may kaangtanan sa konstruksyon, agud malikawan ang peligro sa mga motorista kag pedestrian.
Base sa resulta sang inspeksyon, nadiskubrehan nga expired na ang temporary road closure permit sang proyekto.
Wala man ini sang Mayor’s Permit, wala sang klaro nga koordinasyon sa lokal nga gobyerno, kag wala sang traffic rerouting scheme nga ginpresentar.
Padayon subong ang pag-imbestigar sang City Hall kag ginpaandam nga posible nga may katapat nga penalidad ang contractor kun mapamatud-an nga wala nagpatuman sang sakto nga proseso.
