Sa mga nagliligad nga inadlaw kag semana, halos paliwat-liwat nga unod sang balita kag mga isyu ang nahanungod sa mga kabataan sa siyudad sang Iloilo. Mga menor de edad nga hindi lamang nadalahig, kundi sentro sa pag-ubra sang mga kalainan. Samtang kita tulog ukon naga lagaw, sila naman yara sa sagwa, naga-rambol, involved sa mga illegal nga ulubrahon, inaway diri, bun-anay didto.
Kabataan, ano ang natabo sa inyo?
May mga paminsaron kita. May ikasarang nga magpili. Kun kaya ninyo nga piliun ang mga barkada nga nagadala sa inyo sa peligro, tani kaya man ninyo nga piliun ang direksiyon nga magadala sa inyo sa palaabuton.
Ang pamangkot: Ngaa ginahakos naton ang irinaway kag gamo? Ngaa ginapangita ang kabakod sa rambol, sa barkada; imbes na sa edukasyon, pamilya, kag tagsa-tagsa nga mga handum?
Suno pa gani kay SK Federation President Jelma Crystel Implica, dapat nga pasangkarun ang ‘curfew monitoring.’ Sa interview sang Bombo Radyo, ginpanindugan niya nga importante nga istoryahon kag laygayan ang mga kabataan nga posible ma-involved sa mga kinagamo. Hindi lang para silutan sila, kundi punggan, bag-o pa mangin ulihi ang tanan. Dugang pa ni Implica nga may mga SK chairmans nga personal nga nagaronda kun gab-i para magbulig sa kalinong kag katawhay.
Hambal naman ni Iloilo City Police Office PMAJ. Shella Mae Sangrines, ipaidalum sa intervention sang CSWDO ang mga pamatan-on nga na-rescue sa kinagamo, paagi sa mag ginpabaskug nga programa nga “Batang Pandilla” nga sadto gintawag nga Project B.O.N.G. (Bringing Order to the Nemesis of Gangs), isa ka tikang para ma direksiyunan ang mga kabataan nga ga-intra sa mga ”gang” pakadto sa may kahadluk sa Diyos, kag may abilidad sa pagdumala sang ila emosyonal kag pisikal nga kahimtangan, agud mangin husto ang ila pagkatawo kag mangin respetado nga pumuluyo.
Pero matin-aw ang punto: Hindi pwede nga iduso tanan permi sa sosyudad ang tanan nga responsibilidad.
Pamatan-on, hindi ninyo pagpabay-an nga ang kalainan ang mangin simbolo ninyo. May mas malapad nga kalibutan kaysa sa kanto, kaakig, kag barkada. Bisan ano pa kabaskug sang impluwensiya sang social media ukon mga abyan, dapat mas mabakod man ang inyo tagipusuon nga piliun kun ano ang insakto kag nagakadapat.
Sa piyak nga bahin, kita nga mga ginikanan, hindi man dapat nga maghipos lang. Sa diin kita, samtang ang kabataan naton yara sa sagwa kag bisan diin nga lugar? Mga opisyal sang barangay may curfew gid man sa papel, pero naimplementar gid man bala?
Hindi solusyon ang paghipos. Hindi man solusyon ang pagtinudluanay. Ang kinahanglan amo ang mga tikang kag pagpanindugan.
Kabataan, kung matuod ka nga maisug, panindugan ang tsakto. Kag kita, kung matuod-tuod nga may malasakit, magbugtaw na kita sa kamatuoran. Hindi buwas, hindi sa masunod pa nga insidente. Subong. Kag kung kita ululopod nga maga-ubra, magpartisipar, kag magbinuligay. Para sa mas masanag nga dalan. Mas malinong nga kagab-ihon. Mas manami nga buwas-damlag. #
