Nagreklamo ang driver kag passenger assistant officer sang Metro Iloilo Transport Service Cooperative agud ireklamo nga duha na ka bulan nga wala gihapon nila nabaton ang service contracting.
Sa interview sang Bombo Radyo kanday “Alyas Toto” kag “Alyas Nonoy,” ginpahayag nila nga bisan nakabaton na ang iban nga kooperatiba, tanan nga miyembro sang MITSCOOP wala pa sa gihapon na-releasan.
Gina-kwestyon man nila ang kakulang sa benepisyo pareho sang SSS, PhilHealth kag Pag-IBIG bisan may kaltas sa sweldo.
Suno kay Alyas Toto, makapila na sila nagreklamo sa ila chairwoman nga si Annabelle Falle, apang wala sang aksyon.
Dugang pa ni Alyas Nonoy, ginpahibalo siya nga ang tunga sang service contracting ara na, apang ang nabilin gin-gamit sang motorpool para sa maintenance sang modernized jeepney.
