Patay ang lima ka journalists sa Gaza sa panibag-o nga pagpang-atake nga ginhimo sang Israel.
Gin-ako mismo sang Israeli military nga ang ila target amo si Anas Al Sharif sang news channel nga Al Jazeera, bangud suno sa ila, amo ini ang nagapamuno sang Hamas militant cell kag ginatudlo man sang militar nga involved sa rocket attacks sa Israel.
Nagdepensa naman ang new company; kag antes pa man napatay, nagpanginwala man ang 28-anyos nga si Al Sharif sa sini nga alegasyon.
Nahibaluan nga kaupod ni Al Sharif ang apat ka iban pa nga Al Jazeera journalists kag ang isa ka assistant nga napatay bangud sa airstrike sa ila tent malapit sa Al Shifa Hospital sa eastern Gaza City.
Suno pa sa hospital official, may duha pa gid ka mga tawo nga napatay kadungan sang strike.
Ginkondena naman sang media advocacy group nga Committee to Protect Journalists, human rights groups, kag iban pa nga grupo ang pagpang-atake.
Kun basehan ang Watson Institute for International and Public Affairs’ Costs of War project, ang gyera sang Israel kag Hamas sa Gaza amo ang ginakabig nga pinakamakamamatay nga record para sa journalists.
Suno sa Hamas-run Gaza government media office, 238 journalists na ang napatay halin sang nag-ibwal ang gyera sang October 7, 2023. Samtang base naman sa Committee to Protect Journalists, at least 186 journalists ang napatay sa Gaza conflict.#
