Indi na magpasaka sang kaso ang pamilya sang biktima nga ginlabo-patay batok sa suspek sa Brgy. Abangay, Pototan, Iloilo.
Padayon ang imbestigasyon sang Pototan Municipal Police Station sa kaso sang pagpanglabo sa biktima nga si Reymart Postrado sa Brgy. Abangay, Pototan, Iloilo.
Sa interview sang Bombo Radyo kay Police Major Bryan Alamo, hepe sang Pototan MPS, iya ginpahayag nga napasaka ang kaso sa Hall of Justice sang Sabado kag ginpaidalum ini sa preliminary investigation agud makasumiter pa sang iban nga ebidensya.
Apang, ginpahayag sang pamilya nga indi na sila interesado nga magpasaka sang kaso batok sa suspek nga si alyas Mike nga bayaw man sang biktima.
Suno kay PMaj. Alamo nga pinakadaku kun tani nga saksi amo ang duha ka utod sang biktima nga sanday Raymond Postrado kag alyas Reyen Postrado apang ginbawian man sang kabuhi tungod sang vehicular accident nga natabo sa Brgy. Rumbang, Pototan samtang ginadala nila ang ila utod sa ospital.
Sa pihak nga bahin, temporaryo nga gin-release na ang suspek nga si alyas Mike matapos matapos ang iya reglementary detention period.
Dugang pa ni PMAJ. Alamo, wala pa gihapon may ginpagwa nga resulta ang ospital kon ano gid ang rason sang kamatayon ni Reymart.
By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
