Epektibo na subong nga adlaw ang resignation ni Department of Public Works and Highways (DPWH) Sec. Manuel Bonoan matapos ginbaton ni Presidente Ferdinand Marcos Jr. kahapon.
Isa ka adlaw antes magpasa sang resignation, nagpaguwa pa sang pahayag si Bonoan nga indi ini maghalin sa pwesto bangud sa pagpati nga may salig pa ang Presidente sa iya sa pihak sang mga panawagan nga mag-resign na ini bilang delicadeza bangud sa kontrobersiya nga ginapangatubang sang ahensya.
Magabulos sa iya si Department of Transportation (DOTR) chief, Vince Dizon agud pangunahan ang kampanya kontra sa korapsyon kag tinluan ang ahensya.
Katuyuan sa pag-appoint kay Dizon amo nga mas tutokan kag hatagan sang lihok ang mga isyu nga nagapalibot sa maanomaliya nga flood control projects kag siguraduhon nga ang pondo ginagamit gid para sa pagpahamtang sang mga imprastruktura nga mapuslan sang publiko.
Ang nasambit nga appointment nagapakita sang hugot nga determinasyon sang Marcos administration nga solbaron kag pasabton sa kasuguan ang mga opisyales nga nagahimo sang korapsyon kag indi makasarang sa paghatag sang epektibo nga serbisyo.
