Nagpanindugan ang presidente sang Alpha & Omega Gen. Contractor & Development Corporation nga si Sarah Discaya nga indi sila involved sa mga ghost projects.
Sa Senate Blue Ribbon Committee hearing nga ginpatigayon subong nga Lunes, Septyembre 1, gin-ako sini nga may ginapanag-iyahan siya nga siyam ka construction companies nga naka-secure sang deal sa gobyerno. Apang dugang niya, wala sila sang kahilabtanan sa mga anomaliya.
Sa interpellation ni Senate President Pro Tempore Jinggoy Estrada, ginpaathag ni Discaya nga sang 2022, nag-bid siya para sa 491 projects apang 71 lang ang nakuha nga para lang sa Alpha and Omega.
Gin-estimate sini nga may 400 projects siya sa Department of Public Works and Highways (DPWH) sa bilog nga pungsod, apang indi lamang ini limitado sa flood control.
Kadam-an sa ila nga mga proyekto suno sa iya ang yara sa guwa sang Metro Manila.
“We have in Romblon, Cebu, Bohol, Bacolod, Zamboanga. Hindi naman po kami namimili ng lugar,” dugang sini.
Nagpaandam naman si Estrada nga presuhon si Discaya kun mapamatud-an sang Senado nga may yara sila sang ghost projects.
Nahibaluan nga nalakip ang Discaya-linked firms sa 15 contractors nga ginbuyagyag ni President Ferdinand R. Marcos Jr. nga nag-corner sang P100 billion ukon 20 percent sang kabilugan nga P545-billion flood control projects sa bilog nga pungsod.
