Ginbuyagyag ni Senate Blue Ribbon Committee chairperson Sen. Rodante Marcoleta nga nakagwa na sa Pilipinas ang pila ka personalidad nga naangot sa maanomaliya nga flood control projects sa tunga sang nagapadayon nga imbestigasyon.
Suno kay Marcoleta, wala man niya ginasiling nga nalagyo ang mga ini apang base sa nabaton niya nga impormasyon, ato na sa America ang iban sa ila.
Gin-athag ni Marcoleta nga wala sa gahom sang Senado nga mag-isyu sang hold departure order batok sa mga personalidad nga involved kag lookout order lamang ang mahimo nila nga i-request.
Sa pihak sini, ginpahayag niya nga indi pagtugutan ng Senado nga makalikaw sa hearing ang mga involved kag nagpaandam nga magapagwa sila sang arrest warrant kun indi sang mga ini pagsapakon ang mga subpoena.
Gintuad man ni Marcoleta nga may isa ka tawo nga nagpalayag sang interes nga ibuyagyag ang mga mamalidha kag opisyal sang Department of Public Works and Highways (DPWH) nga may kahilabtanan sa maanomaliya nga proyekto.
Dugang niya, mahimo man gihapon manabat si anay DPWH Secretary Manuel Bonoan bisan pa gintugutan nga indi magtambong sa Senate hearing sang Lunes matapos ang iya pag-resign.
