Nagpagwa sang ebidensya si Senate President Pro Tempore Ping Lacson batok sa isa ka opisyal sang Department of Public Works and Highways (DPWH) nga ginaalegar nga nagtanyag sang early budget insertions para sa 2026 National Expenditure Program (NEP).
Sa iya nga privilege speech, ginpakita ni Lacson ang screenshot sang isa ka mensahe gikan kay DPWH Undersecretary Ma. Catalina Cabral nga ginpadala kay Senate President Vicente Sotto III pila ka adlaw matapos ini ng magdaug sa senatorial elections sang Mayo.
Suno kay Lacson, ang mensahe ang nagatuyo nga mangayo sang mga proyekto nga mahimo nga malakip sa National Expenditure Program, apang namalibad si Sotto.
Base sa screenshot, ginpamangkot ni Cabral kun may priority projects si Sotto para sa “vetting” agud malikawan ang redundancy, overlap, kag masiguro nga nagasanto sa national priorities kag local project menu.
Ginsiling ni Lacson nga ginpagwa niya ang ebidensya matapos ginpanginwala ni Cabral sa bag-o nga tiglikom sang DPWH nga si Vince Dizon ang iya nga papel sa isyu.
