Nag-file na ang Department of Foreign Affairs sang diplomatic protest kasunod sang plano sang China nga magbutang sang nature reserve sa Scarborough Shoal ukon sa Bajo de Masinloc nga kabahin pa sang teritoryo sang Pilipinas.
Ginkumpirma ini ni Foreign Affairs spokesperson Angelica Escalona apang wala pa na-klaro kun gin-summon bala ang Chinese ambassador agud batunon ang note verbale nga ginpaguwa kahapon, Septyembre 12.
Ginlaragway sang opisyal nga “strong, unequivocal and formal articulation” ang pagpamatok sang Pilipinas sa aktwasyon sang China.
Sini nga semana, mismo ang State Council sang China ang nagsapubliko sang ila plano nga mag-establisar sang reserve sa Bajo de Masinloc. Ginsiling nila nga importante ini para nga mamentenar ang diversity, stability, kag sustainability sang natural ecosystem sang isla nga ila ginatawag nga “Huangyan Island.”
Sabat naman sang DFA, indi lehitimo kag isa ka paglapas sa layi ang ginahimo sang China.
Nagpaguwa naman sang statement ang Estados Unidos sang Amerika paagi kay Secretary of State Marco Rubio kun sa diin ginsiling sini nga ang plano sang China ang isa ka pamahog sa regional stability.
Ginpanawagan man sini sa Beijing nga magtuman sa ruling sang Permanent Court of Arbitration nga nagapabor sa kinamatarong sang Pilipinas sa West Philippine Sea. Matandaan nga gindeklarar sang amo nga desisyon nga ilegal ang “nine-dash line” sang China.#
