Ginkumpirma na sang Malacañang ang mga pangalan sang magabug-os sa Independent Commission for Infrastructure (ICI).
Lakip sa ginlawag ni Palace Press Officer Claire Castro subong nga hapon amo sanday former Department of Public Works and Highways (DPWH) Secretary Rogelio “Babes” Singson, Rossana Fajardo nga amo ang country managing partner sa auditing firm nga SGV and Company, kag si Baguio City Mayor Benjamin Magalong.
Pareho nga commission members sanday Singson kag Fajardo samtang special adviser naman kag investigator si Magalong.
Pahayag ni Castro, lunsay sila may eksperyensya kag may masangkad nga ihibalo para sa pag-identify sa mga problema sa institusyon kag sa paghimo sang mga reporma para sa ikaayo sang sistema. Gindugang sini nga boluntaryo sila nga nagbaton sang katungdanan nga ini.
Igatugyan naman kay President Ferdinand “Bongbong” Marcos Jr. ang pag-anunsyo sa masunod nga nga inadlaw kun sin-o ang mangin chairman sang komisyon.
Ang ICI amo ang gintukod agud nga mag-imbestigar sa flood control kag iban pa nga infrastructure projects sa pungsod. May gahum ini nga magrekomendar sang pag-file sang nagakaigo nga criminal, civil, kag administrative cases batok sa mga responsable sa mga anomaliya.
