Castro, no comment sa ‘Fox silic?’ nga sabat ni VP Sara

“No comment” na lang si Palace Press Officer Claire Castro sang ginpangayuan sang reaksyon kaangot sa nangin sabat ni Vice President Sara Duterte kaangot sa ginaproponer nga Pax Silica artificial intelligence and semiconductor hub.

“I have no comment,” suno kay Castro. Sang ginpamangkot siya kun ngaa, nagsabat siya: “Nakita naman natin sa video. So, ano pa ba ang need i-explain?”

Matandaan nga nag-viral ang interview kay Sara sa The Hague, Netherlands sang nag-gwa nga daw kaangay nga indi ini pamilyar sa Pax Silica nga mainit subong nga gina-istoryahan diri sa Pilipinas.

“Ano? Fax sili? Fox silic? Wala, I cannot comment on that,” sabat ni Sara sa iya supporters.

Ini nga 1,600-hectare industrial hub ang kabahin sang U.S.-led Pax Silica initiative nga nagatuyo nga mag-develop sang critical mineral processing kag advanced manufacturing sa New Clark City sa Tarlac para sa semiconductor kag artificial intelligence industries.

Nalakip ang Pilipinas sa 25 ka mga pungsod nga nagpasakop sa amo nga initiative — bagay nga ginabalabagan sang madamo nga grupo lakip na ang environmental, labor, kag farmers’ groups bangud sang potensyal nga halit sini sa palibot ilabi na sa tubig kag sa mataas nga demand sa enerhiya.