Nagpain ang gobyerno sang masobra P46-billion sini nga tuig para makabulig sa tunga sang mangin epekto sang ginatawag nga “Super El Niño”.
Suno kay Palace Press Officer Claire Castro, P6.2-billion ang handa na nga ipagwa para sa Department of Agriculture (DA) agud mahatagan sang fuel assistance, abono, kag iban pa nga farm inputs ang mga mangunguma kag manugpangisda.
May yara man sang P39.82-billion nga ginpain para sa disaster management efforts sang gobyerno.
Para naman sa 2027 national budget, ginaduso sang administrasyon nga pasakaon sa P45.67-billion ang National Disaster Risk Reduction and Management Fund, lakip ang P14.67-billion para sa rehabilitation kag reconstruction sang mga lugar nga apektado sang kalamidad.
Ginaproponer man ang P9.885-billion nga Quick Response Funds para sa mga ahensya nga yara sa frontline sang mga kalamidad, kag mahimo ini dugangan pa paagi sa NDRRM Fund kon kinahanglan.
Para mapalig-on ang food security, ginproponer man ang P11.18-billion para sa rice buffer stocking sang National Food Authority, P4.5-billion para sa crop insurance sang yara sa 2.34-million ka gagmay nga mangunguma kag manugpangisda, kag P46.356-billion para sa National Irrigation Administration, lakip ang P30.437-billion para sa rehabilitation kag development sang irrigation systems.
Ginaproponer man sang DA nga pasangkaron ang minimum access volume para sa mais sa 500,000 metric tons, bangud sa posible nga epekto sang El Niño sa suplay sang pagkaon.
Una na nga ginpahayag ni Dr. Nathaniel Servando, administrator sang Philippine Atmospheric, Geophysical and Astronomical Services Administration (PAGASA), nga posible mapaanggid sa 1997 tubtub 1998 nga sitwasyon ang El Niño phenomenon nga maga-igu sa pungsod subong nga tuig.#
