Ginpanawagan ni Msgr. Meliton Oso, Director sang Jaro Archdiocesan Social Action Center, kaupod ang Simbahang Katolika, ang pag-upod sang mga Pilipino sa Trillion Peso March sa Setyembre 21 sa People Power Monument bilang pahayag sang kabakod batok sa korapsyon kag pagpangawat sa pondo sang pungsod.
Sa interview sang Bombo Radyo kay MSGR. Oso, suno sa iya ginkalipay niya gid ang pagpagwa sang pastoral letter sang CBCP President Cardinal Ambo David bangud sa nagakalatabo nga krisis sa Pilipinas nga may kaangtanan sa pagpanuklo kag pagpangawat sa pondo sa mga flood control projects. Ginpahayag niya nga importante nga may official nga pahayag ang simbahan agud manawagan sang mas madalom nga imbestigasyon sa isyu.
Suno pa kay Oso, ang pamangkot sang pastoral letter nga “how credible are those inquiries with the very institutions conducting them are themselves implicated?” nagahatag sang kabakod nga punto sa pag-usisa. Ginpahayag niya nga wala siya nanamian sa ginahimo sang mga imbestigasyon sa Senado kag Lower House, bangud daw ginalampaso lang ang mga contractors.
Apang base sa privilege speech ni Senator Ping Lacson, klaro nga ang funder nga amo ang mga politiko ang nagakuha sang mas dako nga porsyento sang pondo, kag dapat tanan nga may kalabutan, kag imbestigaran, indi lang ang mga contractors.
Ginpahayag man ni Oso nga indi matuod nga ‘restitution’ ang pagdonar sang kwarta sa mga charities kun ini naghalin sa balhas sang mga empleyado kag tax sang Pilipino. Suno sa iya, ang husto nga restitution amo ang pagbalik sang ginkawatan sa insakto nga paagi.
Ginpanawagan niya ang pag-upod sa Trillion Peso March sa Setyembre 2, isa ka wake-up call para sa mga Pilipino. Suno sa iya, kinahanglan ipahayag sang katawhan ang ila kaisug, kabakod, kag pagpanindugan batok sa korapsyon kag pagpangawat sa pondo sang pungsod.
