Mas nagbaskog pa ang Severe Tropical Storm Nando samtang nagahulag ini pa-naaminhan nakatundan sa Philippine Sea.
Santo sa alas singko sa kaagahon nga weather bulletin sang PAGASA, ulihi nga nakit-an ang sentro sini 780 km nasidlangan sang Casiguran, Aurora.
Dala sang bagyo ang kabaskugon sang hangin nga 100 km/h malapit sa sentro kag pagmadlos nga tubtub sa 125 km/h.
Wala pa sang wind signal nga napaguwa ang weather bureau subong, apang dugang sa bulletin, mahimo ipasaka ang Signal Number 1 sa Northern Luzon subong nga adlaw. Ang pinakamataas nga Wind Signal nga mahimo ma-isyu amo ang No. 5.
Base sa track forecast, magahulag ang bagyo pa-naaminhan-nakatundan sa masunod nga 24 oras antes ini magliso pa-nakatundan naaminhan-nakatundan padulong sa Extreme Northern Luzon.
Magalabay ang bagyo malapit —ukon mahimo gid mag-landfall — sa Batanes ukon sa Babuyan Islands sa tunga-tunga sang Lunes sang hapon tubtub sa gab-i. Samtang nagapalapit naman sa kadutaan, mahimo pabaskugon sang bagyo ang Habagat ukon ang Southwest Monsoon sa lain-lain nga bahin sang pungsod lakip na diri sa Visayas.
Gindugang pa sa bulletin nga magalab-ot si Nando sa typhoon category sa masunod nga 12 oras kag super typhoon nga kategorya naman sa Lunes, Septyembre 22.
Base pa sa PAGASA, mahimo magguwa ang bagyo sa Philippine Area of Responsibility (PAR) sa Martes, Septyembre 23, sa aga ukon sa udto.#
