Dalayon na nga ginpauntat sang Department of Public Works and Highways Region 6 ang P100-milyon nga Mansaya Creek rehabilitation project sa Lapuz, Iloilo City.
Suno kay DPWH-6 director Joel Limpengco, ang kapaslawan nga masaylo ang mga informal settler sa palibot sang creek ang nagapanguna nga rason kun nga wala nadayon ang implementasyon.
Sa interview naman sang Bombo Radyo kay Joy Fantilaga Gorzal, spokesperson ni Iloilo City Mayor Raisa Trenas, iya ginpahayag nga nalikawan kuntani ang problema kun mas maayo ang nangin koordinasyon sang national kag local governments bag-o pa ang pagpatuman sini.
Epektibo ang termination sang proyekto sang Septyembre 16.
Base sa data sang City Local Housing Office, kapin sa 60 pamilya nga informal settler ang nagaistar gihapon sa Mansaya Creek.
Ang proyekto ang gin- award sa YPR Gen. Contractor and Construction Supply, Inc., nga iya sang mga Discaya.
Ini nagabalor sang PHP 101.32 million kag ginsuguran sang Pebrero 10, 2023 tubtob Marso 27, 2024 apang 0.02 percent lang ang na-accomplish.
