Padayon nga ginapatuman sang gobyerno kag mga telecommunication companies sa Pilipinas ang pag-phase out sang third-generation o 3G network agud hatagan dalan ang mas madasig, mas masaligan, kag mas moderno nga teknolohiya pareho sang 4G kag 5G.
Sa interview sang Bombo Radyo kay Engr. Reynaldo T. Sy, Regional Director sang Department of Information and Communications Technology sa Region VI, suno sa iya nga ang pag-phase out sang 3G isa ka estratehiya sang gobyerno agud mapaayo ang kalidad sang internet sa Pilipinas.
Ginpahayag niya nga ang 4G kag 5G nagahatag sang mas mabaskug nga data speed, mas madasig nga response time, kag mas malig-on nga koneksyon, nga kinahanglanon gid sa subong nga panahon sang digital transformation.
Ginpabutyag man ni Sy nga ang pagpauntat sang 3G network magabulig sa pagpabakod sang digital security bangud ang daan nga teknolohiya mas hapos gamiton sa mga cybercrimes kag paglapta sang misinformation.
Suno sa iya, paagi sa pag-phase out sang 3G, mas epektibo nga mabatuan ang mga iligal nga aktibidad nga nagagamit paagi sang 3G system.
Dugang pa, ginpahayag sang Department of Information and Communications Technology nga ang pagpa-untat sang 3G magahatag sang mas daku nga espasyo sa frequency spectrum para sa 4G kag 5G, nga magabulig sa pagpalapad sang serbisyo sang mga telecom providers sa mas madamo nga lugar, lakip na ang mga kabukiran kag mga isla nga limitado pa ang access sa internet.
Ginpanan-aw sang ahensya nga paagi sini nga inisyatibo, mas madamo nga Pilipino ang makabenepisyo sa mas maayo nga koneksyon kag mas epektibo nga digital access.
Suno sa mga datos sang DICT, ginapaabot nga matapos ang phase-out sang 3G sa katapusan sang Setyembre 2025, kag ang bug-os nga pag-decommission sini sa 2026.
Ang mga major nga telecommunication companies pareho sang Globe, Smart, kag DITO nagasuporta sa inisyatibo paagi sa pag-reallocate sang spectrum resources para sa mas abanse nga teknolohiya.
Apang may pila ka sektor sang pumuluyo nga nagapahayag sang kabalaka, ilabi na ang mga nagaestar sa mga lugar nga wala pa sang stable nga 4G kag 5G coverage.
Ginapamangkot nila kun paano sila maka-access sang serbisyo kon wala na sang 3G, kag kun may plano bala ang gobyerno nga maghatag sang alternatibo para sa mga apektado nga users.
Ginpanindugan sang Department of Information and Communications Technology nga padayon ang ila koordinasyon sa mga ahensya sang gobyerno kag mga pribado nga sektor agud masiguro nga ang transition halin sa 3G pakadtu sa 4G kag 5G mangin hapos kag epektibo para sa tanan nga Pilipino.
(Reported by Bombo Bryan Gonzales, via Bombohanay Bigtime)
