Nakumpirma nga kabahin sang isa ka advertisement sang isa ka drink company kag indi parte sa iya retirement ang “Second Decision” nga iya una gin-anunsyo.
Ginbantayan sang basketball fans ang amo nga anunsyo ni James bangud gintawag niya ini sa social media nga “the decision of all decisions”.
Matandaan nga ginhimo man sang basketball icon ini nga marketing strategy sang nagpahayag nga maga-upod siya sa Miami Heat sang Hulyo 2010 nga television special, apang nagguwa nga isa man ka ad reveal.
Nahibaluan nga ini na ang pang-23 nga NBA season sang 40-anyos nga four-time NBA Most Valuable Player.
Ini nga 21-time All-Star kag four-time NBA champion ang naga-uyat sang average nga 24.4 points, 7.8 rebounds kag 8.2 assists sang nagligad nga season kag nagpang-anum sa MVP voting. May career average siya nga 27.0 points, 7.5 rebounds kag 7.4 assists.
Siya man ang ginakilala nga all-time NBA leader sa points (42,184) kag minutes nga nakahampang (59,041). Nakahampang siya sa 1,562 games nga amo ang ikaduha sa pinakamataas sa kabug-usan suno kay Robert “the Chief” Parish (1,611).
