Ginklaro ni Senate President Pro Tempore Panfilo “Ping” Lacson nga pinal na ang iya desisyon nga magpanaog bilang chairman sang Senate Blue Ribbon Committee.
Ini apisar sang mga panawagan sa iya nga magtinir sa pwesto sa kasagsagan sang imbestigasyon sa mga anomaliya sa flood control projects.
Pahayag ni Lacson, kun nagasiling siya nga indi, buot silingon, indi; kag kun magsiling naman siya nga huo, buot-silingon, huo.
Sang Domingo sang gin-anunsyo ni Lacson ang iya nga resignation bangud ginpahayag sini nga dismayado ang pila sa mga senador sa kun paano sini ginadumala ang imbestigasyon sa flood control scandal.
Sang Lunes naman sang nabaton ni Senate President Vicente Sotto III ang iya sulat para sa iya nga paghalin sa pwesto.
Una na nga ginpahayag ni Sotto nga lakip sa ginapilian nga magabulos sa pagpanguna sa gamhanan nga panel amo sanday Senador JV Ejercito, Raffy Tulfo, Kiko Pangilinan, Pia Cayetano, kag Risa Hontiveros.
Sa lima nga ini, tatlo na ang nagpamalibad sa pagbaton sang katungdanan nga amo sanday Ejercito, Tulfo, kag Pangilinan.
Nagpasalamat si Ejercito nga ginakonsiderar siya sa pagpamuno sa komite, apang pahayag sini, nakahibalo siya sa iya nga limitasyon. Nahibaluan man niya suno sa iya nga madamo sa iya kaupdanan ang mas nakahibalo kun paano mag-uyat sa sining importante nga committee.
Sa bahin ni Tulfo, nagpasalamat man ini, apang nagpamalibad nga magpamuno bangud indi sini maluyag nga madula ang iya focus sa tatlo ka committee chairmanships nga iya gina-uyatan. Ini nga mga komitiba suno sa iya ang nagatutok sa iya mayor nga mga adbokasiya nga amo ang labor, migrant workers, kag public services.
Pahayag naman ni Pangilinan, chairperson na siya sang tatlo ka komite sa Senado nga amo ang Agriculture, Food, and Agrarian Reform, Justice and Human Rights, kag Constitutional Amendments and Revision of Codes, gani nga indi na maalam nga desisyon kun batunon pa sini ang Blue Ribbon.
Magasapol ang majority bloc subong nga adlaw agud diskusyunan kun sin-o ang magabulos kay Lacson.
