Nahimo na nga bagyo ang isa ka Low Pressure Area (LPA) nga gina-monitor sa sulod sang Philippine Area of Responsibility (PAR).
Gintawag ini sang state weather bureau sa local name nga Ramil.
Sa latest nga weather bulletin, ulihi nga nakit-an ang sentro sang Tropical Depression Ramil sa kalayuon nga 1,145 km nasidlangan sang Southeastern Luzon. Dala sini ang kabaskugon sang hangin nga 45 km/h malapit sa sentro kag pagmadlos nga tubtub sa 55 km/h.
Nagahulag ini pa-nakatundan naaminhan-nakatundan kag nagaapekto sa Central Luzon, Southern Luzon, kag sa Visayas.
Gilayon nga ginpaidalom sa Signal Number 1 ang areas sang Luzon nga amo ang easternmost portion sang Quezon, Camarines Norte, Catanduanes, Camarines Sur, Albay, kag northern kag eastern portions sang Sorsogon.
Sa Visayas, ginpaidalom sa Signal Number 1 ang eastern portion sang Northern Samar.
Sa track forecast, mahimo maglaslas ang bagyo malapit sa Catanduanes buwas sa aga ukon sa hapon kag mag-landfall sa Aurora ukon sa Quezon sa Domingo sang aga ukon sa hapon.
Kun magsaylo ang direksyon sini pa-nabagatnan, mahimo nga sa lain ini nga area mag-landfall ukon mas madamo nga areas ang ipaidalom sa wind signal.
Kun maka-landfall na, magalabay ang bagyo sa kabukiran sang Northern ukon Central Luzon kag magatuhaw sa West Philippine Sea sa Domingo sang hapon ukon sa gab-i.
Santo sa weather bureau, mahimo magbaskog ang bagyo kag magatupa sa tropical storm category sa buwas sang kaagahon samtang yara ini sa Philippine Sea.
Mahimo ini magguwa sa PAR sa Lunes sang aga.#
