Ginsapubliko ni Senator Risa Hontiveros ang kopya sang iya nga Statement of Assets, Liabilities and Net Worth (SALN) para sa tuig 2024.
Base sa iya SALN as of Dec. 31, 2024, gindeklarar ni Hontiveros ang total assets nga P19.88 million, liabilities nga P897,840, kag net worth nga P18.99 million.
Ang assets sini nagalakip sang residential properties kag personal items kaangay sang cash deposits, vehicles, furniture, jewelry, kag equity sa installment purchases.
Wala ini sang gin-report nga himata nga yara sa serbisyo sa gobyerno kag wala man sang business interests magluwas sa existing small shareholdings sa pila ka enterprises.
Sa press release sang opisina sang senadora, ginsiling nga kabahin ini sang pagtib-ong sang transparency kag accountability.
“I strongly support and welcome the removal of the unjust, unconstitutional and anti-people restrictions on access to public officials’ SALNs,” kabahin sang iya nauna nga statement.
“The new rules should be applied equally on all public officials — from the highest to the lowest, past or present — even with reasonable limitations related to personal or sensitive information and security,” pahayag pa sang senadora.
Nahibaluan nga consistent si Hontiveros sa pagpaguwa sang iya SALNs sa publiko halin sang nag-assume siya sa office sang 2016.
Matandaan nga sang nagligad nga semana, nagpaguwa sang memorandum ang Office of the Ombudsman nga amo ang nagakakas sang barriers sa pag-access sa mga SALN sang mga public officials. Nasulod sa SALN ang summary sang assets kag properties sang mga opisyal kag empleyado sang gobyerno, kag ini nga dokumento ang ginagamit agud ma-monitor ang manggad sang public servants.#
