Ginbasura sang Malacañang ang mga panawagan nga i-abolish ang Department of Public Works and Highways (DPWH).
Suno kay Palace Press Officer Claire Castro, apisar sang mga alegasyon sang kurapsyon batok sa mga opisyal sang ahensya, may mga public servants sa gihapon sa ahensya nga nagahimo sang ila nga obligasyon.
Kun may kakason man suno kay Castro, ini amo ang mga nagahimo sang sala.
“Sa ngayon ay hindi pa naiisip kung dapat itong i-abolish dahil dapat ang tanggalin dito ay iyong mga gumagawa ng mali. Madali naman malaman kung sino-sino ito at sa tulong na rin po ni Secretary Vince, matatanggal ang dapat matanggal sa ahensiya,” pahayag sini.
Nahibaluan nga halin sang ginpa-imbestigaran ni President Ferdinand Marcos, Jr. ang mga iregularidad sa flood control projects, madamo sa mga district engineers sa DPWH ang naulamid kun sa diin gin-akusaran pa ang iban nga nagbulsa sang binilyon ka pesos nga pondo sang gobyerno.
Sang weekend, una na nga ginpahayag ni DPWH Secretary Vince Dizon nga madamo sa mga empleyado sang ahensya ang pangkakason sa posisyon samtang padayon ang imbestigasyon.
Nagpahayag si Dizon nga buhion man sini ang “cadet engineering program” agud nga maka-produce sang maayo kag maalam nga mga civil engineers; mabalik ang morale; kag mapatay ang “padrino system” nga nag-infiltrate sa ahensya.#
