Padayon nakasirado sa publiko ang Louvre Museum sa Paris matapos ginkawatan.
Nakuha sang mga kawatan ang walo ka mga nagkalain-ain kag malahalon nga mga alahas.
Base sa imbestigasyon, nagdungan ang mga suspek sa pagbukas sang msuseum takna ‘las-9:30 sang aga.
Naggamit ang apat ka suspek sang salakyan nga may mechanical lift para makasulod sa Galerie d’Apollon sa tunga sang balcony malapit sa River Seine.
Duha sa mga suspek ang nakasulod pinaagi sa pagguba sang bintanan gamit ang power tools.
Ginpahog nila ang mga guwardiya bag-o ginbuka ang duha ka display nga nagaunod sang mga alahas.
Ginhimo nila pagpangkawat sang apat ka minute kag nakapalagyo sakay sa duha ka scooters.
Pila sa mga ginkawat amo ang emerald necklace kag isa ka pares sang aritos halin kay Empress Marie Louise; brooch nga kilala bilang “reliquary brooch”; Tiara kag brooch nga ginapanag-iyahan ni Empress Eugene ang asawa ni Napoleon III kag isa ka tiara, necklace kag single earing halin sa sapphire set na halin kay Queen Marie-Amelie kag Queen Hortense.
Padayon ang ginapatigayon nga imbestigasyon sang mga otoridad sa nasambit nga insidente.
