Isa ka bag-o nga negosyo ang ginatutukan subong sa Western Visayas, ang pagpadamo sang crayfish, freshwater nga klase sang ”ulang”, nga may mataas nga market value kag demand sa lokal kag internasyonal nga merkado.
Sa interview sang Bombo Radyo kay Mr. Seth Borbon sang Clawseth Aquafarm kag isa ka young farmer, ginpahayag niya nga nagsugod siya sang iya journey sa crayfish farming sang tuig 2023.
Suno sa iya, bag-o pa lang ini nga industriya diri sa Pilipinas kag gamay pa lang ang mga supplier subong, rason nga ginakabig ini nga oportunidad para sa mga bag-o nga negosyante.
Ginpabutyag ni Mr. Borbon nga freshwater ang crayfish kag pwede ini mapadamo sa mga artificial ponds ukon sa mga drum-based nga set-up nga ginadisenyo para sa controlled environment.
Ginagamit nila ang biofloc technology kag aeration system para masiguro ang limpyo nga tubig kag maayo nga pagtubo sang crayfish.
May mga sensor man sila nga naga-monitor sang temperatura kag pH level sang tubig.
Ginsugid man niya nga importante ang pagtuon sang basic aquaculture kag pagkuha sang training halin sa mga eksperto para masiguro ang kalampusan sang proyekto.
Ginahingyo niya ang mga kabataan nga may interes sa agrikultura nga magtan-aw sang posibilidad sa aquafarming bilang isa ka sustainable nga negosyo.
Suno kay Mr. Borbon, ang mensahe niya sa mga naga-pangita sang bag-o nga oportunidad amo nga indi na kinahanglan maghalin pa sa pungsod para magpangabuhi, pwede na magsugod sang negosyo sa uma gamit ang teknolohiya.
