Pasikreto lang nga nagpatigayon sang test sa nuclear weapons ang China kag ang Russia.
Ini ang bag-o nga alegasyon ni United States President Donald Trump. Dugang sini, indi man magpaulihi ang Estados Unidos sang Amerika.
“Russia’s testing, and China’s testing, but they don’t talk about it,” pahayag sini sa isa ka interview. “I don’t want to be the only country that doesn’t test.
Magluwas sa Beijing kag Moscow, naga-test man suno kay Trump ang North Korea kag ang Pakistan sa ila nga arsenals.
Matandaan nga nag-anunsyo ang Russia nga nag-test ini sang bag-o nga nuclear-powered cruise missile nga Burevestnik kag sang nuclear-powered kag nuclear-capable nga underwater drone.
Ginpaklaro naman kay Trump kun nagaplano bala ang US nga mag-detonate sang nuclear weapon sa labing-una nga tion sa masobra tatlo ka dekada. Sabat sini: “I’m saying that we’re going to test nuclear weapons like other countries do, yes.”
Nahibaluan nga wala sang iban nga mga nasyon magluwas sa North Korea ang kilala nga naga-conduct sang nuclear detonation sa sulod na sang malawig nga dinekada.
Mangin ang Russia kag China ang wala man nagahimo sini nga tests halin sang 1990 kag 1996.
Apang diskumpyado diri si Trump. Pahayag sini, “They don’t go and tell you about it. As powerful as they are, this is a big world. You don’t necessarily know where they’re testing… They test way underground where people don’t know exactly what’s happening with the test. You feel a little bit of a vibration.”
Nahibaluan nga signatory ang US halin pa sang 1996 sa Comprehensive Nuclear-Test-Ban Treaty. Sa idalom sini, gina-ban ang atomic test explosions —pareho sa military kag sa civilian purposes.
