Naka-record sang pila ka mga landslides kag rockfall sa mga national kag barangay roads sa mga probinsya sang Iloilo kag Antique kasunod sang paglaslas ni Bagyo Tino sa Western Visayas.
Sa Antique, may natabo nga landslides kag rockfall sa national road sang Barangay Tagimtim kag Pacencia sa banwa sang Tobias Fornier.
May pagtiphag man sang duta sa national road sang Barangay Iba, Anini-y, kag sa barangay road sa Laua-an, nga nagresulta sa paghinay sang dalagan sang trapiko sa mga amo nga lugar.
Natiphag man ang dalan sa Barangay Lopez Vito, San Joaquin, Iloilo rason nga indi maagyan sang mga depampasahero nga bus nga may ruta nga Iloilo–Antique kag pabalik.
Bangud sa nasambit nga landslides, apektado ang pagbiyahe sang mga lowered motor vehicles kag heavy trucks, samtang limitado lamang sa high vehicles kag motorcycles ang makalabay sa Iloilo–Hamtic National Road.
Samtang, ang Iloilo–Anini-y National Road ang temporaryo nga indi maagyan sang bisan ano nga klase sang salakyan samtang padayon ang clearing operations sang DPWH kag mga lokal nga otoridad.
Sa interview sang Bombo Radyo kay Raul Fernandez, regional director sang Office of the Civil Defense (OCD) Region 6, iya ginpahayag nga nagpatigayon sila sang aerial inspection agud makita ang kabilugan nga halit nga ginbilin ni Bagyo Tino sa rehiyon.
Suno sa iya, ginlibot sang ila team ang mga probinsya sang Southern Iloilo, Guimaras, kag Capiz kahapon nga adlaw bilang kabahin sang post-disaster assessment sang ahensya.
Pahayag ni Fernandez, wala sang daku nga halit nga naobserbahan sa Southern Iloilo kag Guimaras, apisar pa nga madamo sang debris sa mga coastal areas nga dala sang mabaskog nga hangin.
Dugang pa ni Fernandez, minimal lang ang mga report nga ila nabaton angot sa mga nahalitan nga mga balay, apang ginpabutyag sini nga madamo sang mga puno ang nagkalatumba.
Sa subong, ginatinguhaan sang mga personel sang Department of Public Works and Highways (DPWH) kag Local Disaster Risk Reduction and Management Offices (LDRRMO) nga malimpyuhan kag mabalik sa normal ang dalanon agud masiguro ang kaluwasan kag normal nga pagbiyahe.
