Mas nagbaskog pa ang super typhoon Uwan samtang nagahilapit ang pag-landfall sini sa Aurora.
Sa alas singko sa hapon nga weather bulletin sang state weather bureau, nakit-an ang mata sang bagyo sa kalayuon nga 110 km naaminhan sang Daet, Camarines Norte ukon 150 km nasidlangan naaminhan-nasidlangan sang Infanta, Quezon.
Dala sini ang kabaskugon sang hangin nga tubtub sa 185 km/h malapit sa sentro kag pagmadlos nga tubtub sa 230 km/h.
Padayon ini nga nagahulag pa-nakatundan naaminhan-nakatundan sa kadasigon nga 30 km/h.
Napaidalom na subong sa Wind Signal No. 5 ukon pinakamataas nga wind signal ang southern portion sang Quirino; southeastern portion sang Nueva Vizcaya; northeastern portion sang Nueva Ecija; central portion sang Aurora; Polillo Islands; kag ang northern portion sang Camarines Norte.
Napaidalom man ang madamo nga areas sang Luzon kag Visayas sa Signal Numbers 1, 2, 3, kag 4.
Nagapabilin naman sa Wind Signal No. 1 ang Guimaras, Iloilo, Capiz, Aklan, kag Antique ukon bilog nga Western Visayas kun sa diin posible ang minimal to minor impacts bangud sang mabaskog nga hangin.
Nalakip naman ang Antique kag Guimaras sa mga lugar nga ginpaandaman sang posible matabo nga storm surge nga 1-2 metros ang kataason.
Nag-abiso ang weather bureau nga magpalayo anay sa coastal areas, ikanselar ang mga aktibidad sa kalalawran, kag magsaylo sa mas mataas nga areas nga malayo sa baybayon kag sa storm surge-prone areas.
Gina-forecast nga magalabay ang mata sang bagyo malapit sa Polillo Islands antes ini mag-landfall sa central portion sang Aurora karon sa gab-i ukon buwas sa kaagahon.
Bangud sang kalapiton sini kag kadakuon sang eyewall sang bagyo, posible nga may direkta man ini nga pag-igo sa Calaguas kag Polillo Islands.
Pagkatapos sang landfall, magaagi ini sa kabukiran sang Northern Luzon kag magatuhaw sa Lingayen Gulf ukon kadagatan sang Pangasinan ukon La Union buwas sa aga.
Magahina ang pwersa sini kun makaagi na sa kabukiran, apang ginalantaw nga magapabilin sa typhoon category samtang yara sa Northern Luzon.#
Photo: Japan Meteorological Agency
