Naka-request na ang Pilipinas sa International Criminal Police Organization (Interpol) nga magpaguwa sang red notice batok kay former presidential spokesperson Harry Roque.
Ginkumpirma ini ni Winston Casio, spokesperson sang Presidential Anti-Organized Crime Commission (PAOCC).
Pahayag sini, ginapakita ni Roque nga biktima siya sang political persecution, apang indi man ini matuod bangud ang akusasyon batok sa iya ang nakasandig man sa mga ebidensya.
Sang Mayo, matandaan nga may gindagdag nga arrest warrant batok kay Roque, Lucky South 99 representative Cassandra Ong, kag 48 ka iban pa bangud sa qualified human trafficking. Ini ang may kaangtanan sa ginaalegar nga scam hub nga ginapadalagan sang Philippine Offshore Gaming Operator (POGO) firm nga Lucky South 99 sa Porac, Pampanga.
Base sa PAOCC, nakakita sila sang ebidensya nga may torture, kidnapping, kag sex trafficking sa site. Magluwas diri, may na-rescue ang awtoridad nga 158 nga foreign employees sa amo nga scam hub.
Gina-akusahan si Roque nga amo ang nagbulig nga makakuha sang operating license ang amo nga POGO hub. Natumod man siya nga head sang Lucky South 99 legal department sa license reapplication apang gin-deny ini sang ulihi sang Philippine Amusement and Gaming Corporation (PAGCOR).
Ginpanginwala man ni Roque ang akusasyon apang wala na siya nagbalik diri sa Pilipinas. Nagapangayo ini sang asylum sa Netherlands.#
