Nag-surrender kay Igbaras Mayor Juvic Elmido Escorpion kahapon nga adlaw, November 24, ang isa ka myembro sang New People’s Army (NPA).
Ginkilala ang surrenderee kay alyas Patrick, 30-anyos, single, tumandok sang Igbaras, Iloilo kag myembro sang Regional Headquarters KR-Panay sa sulod sang pulo ka tuig.
Suno sa surrenderee, indi na sini masarangan ang pangabuhi sa bukid kag gusto na sini nga makaupod sang hilway ang iya pamilya.
Sa interview sang Bombo Radyo kay Lieutenant Colonel Jekyll Julian Dulawan, Commanding Officer sang 61st Infantry Battalion, Philippine Army, iya ginapahayag nga nagdugay man sang pila ka adlaw ang negosasyon kay alyas Patrick.
Si alyas Patrick ang isa sa mga nabilin nga katapo sang KR-Panay si Alyas Patrick matapos ang sunod-sunod nga nagluntad nga engkwentro sa tunga sang NPA kag mga katapo sang militar sa area sang Tapaz, Capiz.
Pahayag pa niya, wala man sang samad ukon pilas si Alyas Patrick sang nag-surrender apang magapaidalom ini sa gihapon sa medical checkup.
Wala man sang may narekober nga mga armas ang mga otoridad kay Alyas Patrick.
Dugang pa ni Dulawan, magapabilin sa kustodiya sang 61st Infantry Battalion si Alyas Patrick agud masiguro ang iya seguridad.
Samtang, nagpasalig naman si Mayor Vicente Escorpion sang Igbaras, Iloilo nga hatagan sang suporta kag proteksyon ang miyembro sang New People’s Army (NPA) nga nag-surrender sa ila banwa.
Suno sa alkalde, wala sang malain nga matabo sa nagabalik sa sabak sang gobyerno kag siya mismo ang nagtanyag sang personal nga seguridad kag pagbulig.
Antes pa man, ang kapitan sang barangay ang una nga nag-coordinate sa alkalde matapos magpalapit sa ila ang nagsurrender bangud sa kabudlay sang kabuhi sa kabukiran.
Suno pa sa alkalde, tatlo ka semana ang ila ginpatigayon nga komunikasyon kag nagikan pa ang surrenderree sa Manila tubtob nakaabot sa Guimbal antes nag-abot sa pagsurender sa Igbaras.
Ginkumpirmar man sang alkalde nga may ginhatag na nga cash assistance sa surrenderee agud mabuligan siya sa iya pagsugod liwat sang normal nga kabuhi.
Padayon ang koordinasyon sang lokal nga gobyerno kag law enforcement agencies para sa mga gusto pa nga magbalik sa sabak sang gobyerno.
Text: Cherie Mae Marcon
.){kind=link}