Nagpasalig ang administrasyon ni Presidente Ferdinand Marcos Jr. nga indi lamang “gamay” nga mga personalidad ang dakpon, kundi lakip man ang “dalagko nga isda” nga ginapasuni nga sa likod sang ma-anomaliya nga flood control projects sa pungsod.
Liwat nga ginsulit ni Presidential Communications Secretary Dave Gomez ang nauna nga pahayag sang Presidente nga ang mga personalidad nga nalakip sa korapsiyon sa flood control projects ang gina-target nga mapriso antes mag-abot ang Paskwa.
Ginpahayag ini sang opisyal kadungan sang ginpatigayon nga anti-corruption protests sa nagkalain-lain nga lugar sa pungsod.
Suno kay Gomez, nagapadayon ang madalom kag masangkad nga imbestigasyon kag kinahanglan nga masiguro nga mabakod ang ebidensya sa case build-up.
Sa separado nga interview, ginpahayag man ni Gomez nga determinado ang gobyerno nga magtukod sang “airtight cases” para masiguro nga mangin mabakod ang pag-usisa kag pagpasaka sang kaso batok sa mga ginapasuni nga na-involve sa iskandalo.
Ginsiling man sang opisyal nga ginarespeto sang Palasyo ang kinamatarong sang publiko sa malinong nga pagpahayag sang ila sentimyento kag pagkondena sa korapsiyon.
