Nagtaas ang tyansa nga mangin bagyo sa masunod nga 24 oras ang isa ka low pressure area (LPA) nga na-monitor sa guwa sang Philippine area of responsibility (PAR).
Suno sa Philippine Atmospheric, Geophysical and Astronomical Services Administration (PAGASA), 2:00 kaina sang kaagahon, nasiplatan ang LPA sa kalayuon nga 1,290 km nasidlangan sang Eastern Visayas.
Suno kay PAGASA weather specialist Chenel Dominguez, posible nga magsulod ang bagyo sa PAR buwas, kag tawgon ini sa local name nga Wilma.
Ini ang mangin una nga bagyo sa Pilipinas sa Disyembre, kag ika-23 naman sa pangkabug-usan nga tuig.
Gina-forecast nga maga-landfall ini sa Eastern Visayas ukon sa Caraga sa tunga-tunga sang Byernes kag Domingo. Posible nga ibatak ang wind signals sa sini nga mga lugar umpisa sa Huwebes.
Indi pa subong klaro ang forecast track sang LPA, apang nagpaandam ang state weather bureau sang mga pag-ulan-ulan sa Bicol Region, Eastern Visayas, kag Mindanao umpisa sa Byernes.
Mahimo magtabok ang bagyo sa Visayas kag sa Southern Luzon kag magadala sang madamol nga pag-ulan. May potensyal man ini nga bagyo nga magpabaskog sang shear line rains sa eastern portion sang Northern kag Central Luzon.
Base sa PAGASA, sang 2013 pa sang may bagyo sa Pilipinas nga nag-umpisa sa letra nga W. Sang amo nga tion, Wilma man ang pangalan sang tropical cyclone.
Una na nga ginpahayag sang state weather bureau nga isa tubtub duha pa ka mga bagyo ang magporma ukon magsulod sa PAR. Ang nabilin nga mga bagyo ang ginhingadlan nga sanday Yasmin kag Zoraida.
