Ginkumpirmar sang Bureau of Immigration (BI) nga maga-umpisa na sila sang deportation proceedings batok sa ginapahayag nga importer sang luxury vehicle nga ginapanag-iyahan sang kontraktor nga sanday Sarah kag Pacifico “Curlee” Discaya, nga naulamid sa kontrobersyal nga flood control corruption scandal.
Suno kay BI Commissioner Joel Anthony Viado, nakabaton ang ahensya sang impormasyon halin sa Land Transportation Office (LTO) nga naaresto sang Nobyembre 27 sa Makati City ang car importer nga Cao Cheng.
Ini bangud sa nagkalain-lain nga paglapas, kaangay sang obstruction of apprehension and prosecution of criminal offender, illegal use of alias, false representation, kag willful misrepresentation of material information.
Sandig sa recored sang LTO, naggamit si Cao sang Alyas nga “Martin Zhao.”
Sa subong, nakadetene si Cao sa Philippine National Police (PNP) Highway Patrol Group sa Camp Crame, Quezon City.
Lauman nga igasaylo si Cao sa BI sa Taguig City, matapos ang iya inquest kag medical examination.
Suno sa BI, kun mapamatud-an nga guilty si Cao, magapangatubang ini sang deportation kag blacklisting.
Matandaan nga nag-umpisa sang Nobyembre 20 ang public auction para sa pito ka luxury cars sang mag-asawa nga Discaya.
Ginabulubanta P100 million ang wala pa nabayaran nga buwis sa pagsulod sang 13 sa 30 ka mga luxury vehicles.
Suno sa Bureau of Customs (BOC), ginalauman sini nga makakolekta sang P103.8 million kun mabaligya ang tanan nga salakyan.
