Pabakuron pa gid sang Department of Social Welfare and Development (DSWD) ang mga programa kaangay sang nagabulig sa mga tawo nga nagapuyo sa karsada.
Ini bangud ginapaabot ang pagtaas sang pagpamalimos sa sini nga bulan sang Disyembre nga tion sang Paskwa.
Suno sa DSWD, ang ila Pag-abot Program nakabulig kag nakahatag sang assistance sa 10,570 ka pamilya kag indibidwal sa kalsada sa sini nga tuig 2025.
Sa isa ka pahayag ni DSWD spokesperson kag Assistant Secretary Irene Dumlao nga ginapaabot nila ang pagtaas sang insidente sang pagmalimos sa kalsada sa Paskwa.
Gindugangan niya nga importante ang mabuligan kag maprotektahan ang mga mahuyang nga sektor, labi na ang mga kabataan, batuk sa abuso kag iban pa nga peligro.
Ginpahayag niya nga ang Pag-abot Program nagatuyo nga buligan kag giya-an ang mga pamilya kag indibidwal sa kalsada para makabaton sila sang mas safe kag mas maayo nga kabuhi.
Sa karon, nakabulig ang programa sa 1,296 ka kabataan nga ara sa kalsada (CISS), 1,894 ka indibidwal nga ara sa kalsada (IISS) kag 7,380 ka pamilya nga ara sa kalsada (FISS).
Naabot sila sang Pag-abot teams paagi sa padayon kag maayo nga koordinasyon sa field operations.
Dugang pa ni Dumlao nga ang DSWD committed sa pagbalik sang mga benepisyaryo sa ila komunidad, paghatag sang husto nga social protection services, kag pagpangita sang long-term nga solusyon para indi na sila mabalik sa kalsada.
Ginpanawagan man sang DSWD ang publiko nga buligan kag protektahan ang mga tawo kag pamilya nga ara sa gihapon sa mga kalsada.
