Nagpasaka sang ethics complaint ang abogado nga si Atty. Eldrige Marvin Aceron batok kay Senator JV Ejercito nga amo mismo ang chairperson sang Senate Committee on Ethics and Privileges.
Ginareklamo si Ejercito sang “gross neglect of constitutional duty in office” bangud wala ini sang hulag nga ginhimo sa separado nga ethics complaint batok kay Sen. Chiz Escudero nga ginpasaka sadtong Oktubre 2, 2025.
“Despite the passage of 109 days since the filing of the ethics complaint against Sen. Escudero, respondent has failed to assign a case number, failed to provide any notice or communication, failed to take any action whatsoever,” kabahin sang gin-file nga reklamo.
Sa iya complaint, ginhingyo man sang abogado ang pagkakas kay Ejercito bilang chairperson sang amo nga committee.
Nagpanindugan naman si Ejercito nga indi pa makapatigayon sang hearings ang iya nga komitiba bangud wala pa nakumpleto ang ila nga mga myembro. Magluwas diri suno sa iya, nangin masako man ang Senado sa budget deliberations kag sa bicameral conference committee.
“But rest assured that the Ethics Committee will convene and hear pending cases once it is fully constituted and when session resumes. The said cases will be heard in order of filing,” kabahin naman sang sabat sang senador.
Matandaan nga ang ethics complaint batok kay Escudero sang 2025 ang nag-ugat sa P30-million nga campaign donation nga iya ginbaton halin sa kontraktor nga si Lawrence Lubiano kadungan sang 2022 elections.
