Ginkakas sanday Senador Ronald “Bato” dela Rosa kag Joel Villanueva bilang mga myembro sang Senate Committee on Ethics and Privileges.
Sa sesyon sa Senado, gin-eleher ang duha ka katapo sang minority bloc nga sanday Senador Imee Marcos kag Rodante Marcoleta agud magbulos sa duha.
Gin-aprubahan naman ni Senate President Vicente “Tito” Sotto III ang mosyon nga wala sang objection halin sa iban nga mga senador.
Nag-absent si Dela Rosa sa Senado halin sang Nobyembre kasunod sang pahayag ni Ombudsman Jesus Crispin Remulla nga nagpaguwa na ang International Criminal Court (ICC) sang arrest warrant batok sa iya.
Sa pihak nga bahin, nagapangatubang naman si Villanueva sang mga panumbungon nga kaangot sa ghost flood control projects.
Ang Ethics Committee amo ang nagapanguna sa pag-uyat sang mga isyu nga naangot sa conduct, kinamatarong, pribilehiyo, safety, dignidad, integridad, kag reputasyon sang Senado kag mga senador.
