Posible nga iduso ang ordinansa sa Iloilo City Council agud nga ma-untat ang ginahimo sang iban nga establisyemento nga nagapabayad para nga magpagamit sang restroom kadungan sang Dinagyang Festival.
Ini kasunod sang mga reklamo nga nabaton halin sa festivalgoers kadungan sang selebrasyon subong nga tuig.
Sandig sa reports, may iban man nga establisyemento nga nagapangita sang resibo sa mga kustomer antes sila pasugtan nga makagamit sang restroom.
Suno kay Majority Floor Leader Rex Marcus Sarabia, na-turn off gid siya kasunod sang amo nga mga report.
Duha ka adlaw ang major highlights sa Dinagyang suno sa iya nga nagatib-ong man sang turismo sang syudad. Dapat suno sa iya nga mag-contribute man ang business establishments.
“Burden ni ya, kag you know, tanan man kita nga mga pumulyo naga-sacrifice sa pag-host sang world-class nga event — from traffic to added nga mga concerns. Ang mga pumuluyo gagasto gani para mag-successful ang aton nga celebration, [while] ang mga negosyo nagaginansya, gaabtik ang ila sales,” suno kay Sarabia.
Pahayag pa sini, indi man daku nga gasto ang tubig kag habon para ma-akomodar ang mga bisita sa syudad.
“I don’t think it is proper,” pahayag pa sini nga nagatumod sa mga nagasukot sang resibo kag bayad antes maka-usar ang mga tawo sang CR.
Ginpahanumdom sini nga duha ka adlaw lang ang selebrasyon sa Dinagyang, kag makapagusto naman ang mga negosyante sa nabilin nga mga inadlaw sa sulod sang isa ka tuig.
Matandaan nga una na nag-post ang konsehal nga nagapanawagan sa mga tag-iya sang negosyo sa syudad nga likawan ang amo nga practice bangud makahuluya ini kag nagaguba sang imahe sang syudad sa patag sang turismo ilabi na bangud nagadagsa ang mga turista sa kada ginaselebrar ang Dinagyang.#
