Personal nga ginbaton nanday Mayor Raisa Treñas kag Engineer Neil Ravena, Department Head sang City General Services Office, ang Association of Southeast Asian Nations (ASEAN) Clean Tourist City Award nga nadag-an sang syudad sang Iloilo.
Ginpatigayon ang awarding ceremony sa Cebu City kun sa diin yara man si Tourism Secretary Christina Frasco.
Ini na ang ikaduha nga tion nga nakuha sang Iloilo City ang amo nga pagkilala bangud sa pinasahi nga kalimpyo, environmental management, kag tourism infrastructure.
Sa interview sang Bombo Radyo kay Ravena, iya ginpahayag nga may ginpadala nga validation kag on-site inspection sa syudad kag may nag-check man sang mga feedback sang mga turista sa katinlo sang lugar.
Una nga nabaton sang Iloilo City ang amo man nga award sang 2020–2022 term. Sang amo nga tion, ginpatigayon ang awarding ceremony sa Brunei kasunod sang mga inspeksyon sa public spaces, traffic management systems, kag environmental policies.
Sa mensahe naman ni Mayor Treñas, ginpalab-ot sini ang iya pagpanginbulahan sa tanan nga mga Ilonggo nga committed para sa pagpabilin sang katahum kag kalimpyo sang palibot.
“Ini nga dungog nagapakita sang padayon nga commitment sang Iloilo City Government sa pag-maintain sang kalimpyo, katahum, kag sustainable nga turismo sa syudad sang Iloilo,” kabahin sang mensahe sang alkalde.
Nahibaluan nga ini nga pagkilala ang kabahin sang ASEAN Tourism Standards Awards program nga nagapasidungog sang mga syudad sa Southeast Asia nga malimpyo, may maayo nga waste management, environmental protection kag tourism facilities.#
