Naka-istorya na si General Services Office (GSO) head Engineer Neil Ravena sa City Legal Office sang Iloilo City Government kaangot sa ipasaka nga reklamo sa padayon nga nagahaboy sang basura sa Jaro River.
Ini matapos nga na-recover ang sinako nga expired goods kaangay sang soft drinks kag bottled water apisar nga ginasunod na gani sang limpyo sang mga tinawo sang GSO ang amo nga suba.
Suno kay Ravena, na-trace na nila nga halin sa area sang Banuyao, La Paz ang naghaboy sang plastic bottles kag na-identify na mismo nila ang persona.
Pahayag ni Ravena, nadiskubrehan man nila nga may dugang pa gid nga inughaboy kuntani sa suba kag daw kaangay nga naka-schedule ang pag-dispose sang sini nga sinako nga nga plastic bottles.
Madugay na nila ini nga ginahimo suno kay Ravena — bagay nga gintawag sini nga “very blatant move kag mindset” nga daw indi mahangpan.
Nagpamalibad anay ang opisyal nga hingadlan kun sin-o ang nagahaboy sang basura samtang nga ginaproseso pa ang reklamo nga ipasaka.
Dugang sini, ang kaso nga ipasaka nga paglapaw sa environmental laws amo ang magapamatuod nga seryoso ang GSO kag indi pag-itolerar ang kaangay sini nga paminatasan sa palibot.
Antes sini, nauna na nagpabutyag sang kaakig si Ravena sa iya Facebook post nga nagasiling: “Sa naghaboy sa Jaro River sang imo expired commodities, pangita ka na Law Firm, kay I will exhaust all efforts nga ma-filan ka gid kaso in violations sang environmental laws.”
Dugang sini: “Kabalo ka nga dugo na lang wala mag-gwa sa tawo namon nga naga-salom para maglimpyu lang ang suba! The risk nga mag ubog sa higko nga tubig! Try me!”#
