Padayon nga nagahulag ang Bagyo Basyang sa direksyon nga pa-nakatundan naaminhan-nakatundan kag yara na subong sa Cebu Strait.
Sa 8:00 p.m. bulletin sang state weather bureau, nakit-an ang sentro sang bagyo sa kadagatan nga sakop sang Dalaguete, Cebu.
Dala sini ang kabaskugon sang hangin nga 55 km/h malapit sa sentro kag pagmadlos nga tubtub sa 75 km/h. Nagahulag ini west northwestward sa kadasigon nga 10 km/h.
Nagapabilin naman sa Signal No. 1 ang Guimaras, Iloilo, Capiz, Antique kag ang Aklan ukon ang bilog nga Western Visayas. Subong nga gab-i, lakip ang Capiz kag Iloilo sa ginpasaka sa Red Warning bangud sa mabaskog nga ulan nga posible magdala sang seryoso nga pagbaha kag pagtiphag sang duta.
Sa forecast track, maga-landfall ang bagyo sa southern portions sang Cebu kag Negros Oriental karon sa gab-i ukon buwas sa kaagahon. Kasunod sini, magahulag ang bagyo pakadto sa southern portion sang Panay Island ukon sa Panay Gulf.
Sa masunod nga 12 oras, magaluya na ang bagyo kag mahimo nga low pressure area.
