Wala sang paghinulsol si former Philippine National Police Chief Gen. Nicolas Torre III nga nangin instrumento ini sa pag-aresto kay anay Presidente Rodrigo Roa Duterte.
Suno kay Torre nga general manager subong sang Metropolitan Manila Development Authority (MMDA), gintungdan lang niya ang iya opisyal nga responsibilidad kag wala siya sang personal nga motibo.
Madumduman nga gin-aresto si Duterte sang Marso 2025 sa Manila sa idalom sang arrest warrant nga gin-isyu sang International Criminal Court (ICC).
Ang amo nga pag-aresto ang nangin dalan kun ngaa napreso subong si Duterte sa The Hague.
Subong nga adlaw natalana ang confirmation of charges hearing kay Duterte sa Pre-Trial Chamber sang tribunal.
Iga-determinar sang tatlo ka babaye nga judges sang chamber kun may bastante nga ebidensya agud ma-establisar ang substantial grounds agud matum-ok si Duterte sa pagkumiter sang crimes against humanity.
