Bangud sa padayon nga pag-evolve kag pag-innovate sang Queen City Development Bank, natungdan sini ang papel bilang partner sa pagpaumwad pa sang komunidad.
Sa pagbukas kahapon, Pebrero 23, sang tatlo ka adlaw nga Top Level Management Conference nga ginhiwat sa Dr. Rogelio M. Florete Leadership Center sa Queenbank Building sa Valeria Street, Iloilo City, ginpahayag ni Miss Margaret Ruth Florete, President kag CEO sang Queen City Development Bank, nga padayon ang pag-evolve sang Queenbank agud makadungan sa madasig nga pag-uswag sang teknolohiya kag sa nagabag-o nga dynamics sang merkado.
Suno kay Miss Margaret Ruth Florete, mabatyagan sang mga komunidad ang presensya sang bangko kag nagapabilin ini nga importante nga partner sang mga kliyente, labi na sa tion sang mga pagbag-o kag kakulang sang kasiguruhan.
Nakita sang Queenbank ang madamo nga oportunidad nga ginadala sang inobasyon, entrepreneurship kag resilience.
Ginpanindugan ni Miss Margaret Ruth Florete nga nakasentro ang bangko sa responsible growth kun sa diin indi lamang ang kita ang ginahatagan importansya kundi pati ang klaro nga katuyoan.
Lakip sa mga tikang sang Queenbank amo ang pagduso sang organic growth, pag-invest sa mga empleyado, digital capabilities kag sa mga physical spaces nga mas makabulig sa mas epektibo nga pagsuporta sa mga kliyente.
Bisan pa sang indi maisip nga mga nalab-ot sang Queenbank, nagapati ini nga mas madamo pa gid ang oportunidad nga nagahulat sa Queenbank agud mas mapalapad pa ang serbisyo kag epekto sini sa mga komunidad nga ginapangalagaran sini.
Ang tema sang Top Level Management Conference subong nga tuig amo ang Building Relationships, Building Business, nga nagapakita sang commitment sang Queenbank sa paghatag prayoridad sa papel sini sa komunidad.
Ang Queenbank gina-regulate sang Bangko Sentral ng Pilipinas kag miyembro sang Philippine Deposit Insurance Corporation, Chamber of Thrift Banks, kag Florete Group.
