Gin-anunsyo sang Qatar ang pagkaaresto sa grupo sang mga espiya nga naangot sa Islamic Revolutionary Guard Corps (IRGC) sang Iran.
Suno kay Bombo Joseph Rivera, Bombo International Correspodent sa Qatar, 10 ka suspek ang gindakop sang mga otoridad kun sa diin pito sa ila ang mga espiya nga ginmanduan nga magbantay sa mga vital military facilities, kag ang tatlo naman ang nagapanguna sa sabotage operations.
Sa ginhimo nga imbestigasyon, gin-ako sang mga suspek ang ila nga koneksyon sa IRGC kag ang mando sa ila nga pagpang-espiya.
Nakumpiska man sa ila posisyon ang mga communication devices kag iban pa nga high-tech nga gamit.
Nahibaluan nga nagapadayon ang tensyon sa Middle East matapos nagpatigayon ang Iran sang sunod-sunod nga pag-atake batok sa Qatar kag iban pa nga mga pungsod sa Middle East kasunod sang gintingob nga air strikes sang Estados Unidos kag Israel batok sa Iran.
Naka-detect naman ang Ministry of Defence sang Qatar sang tatlo ka cruise missiles, 101 ballistic missiles, kag 39 drones nga nagsulod sa ila nga airspace humalin sang nagsugod ang kinagamo.
Suno sa otoridad, tanan nga ini ang na-intercept kag nawasak sang ila nga depensa.
 sang Iran.){kind=link}