Nanindugan ang bag-o nga Supreme Leader sang Iran nga si Ayatollah Mojtaba Khamenei nga magapabilin nga sirado ang Strait of Hormuz.
Pahayag sini, gamiton nila ang amo nga strait bilang paagi agud nga ma-pressure ang ila kasumpong.
Kabahin ini sang iya labing-una nga mensahe halin sang nag-ibwal ang gyera sa Middle East. Wala sang audio ukon video si Mojtaba, apang ginbasa sang state TV broadcaster ang iya public remarks.
Ginsupak ni Khamenei ang mandu ni US President Donald Trump kag panawagan sang iban nga global leaders nga dapat nga buksan na ang amo nga alagyan sang langis.
Ginakabig ang Strait of Hormuz nga isa sa pinaka-importante nga shipping chokepoints sa bilog nga kalibutan nga amo ang nagaangot sa Persian Gulf sa madamo nga kapungsuran. Antes ang gyera, ginabanta nga 20% sang global production sang langis ang nagalabay sa sini nga waterway. Mahapos para sa Iran ang magsirado sini nga alagyan bangud sila ang nagakontrol sa northern side sang amo nga passageway.
Nagpaandam man si Khamenei sa iya statement nga dapat siraduhan na ang tanan nga U.S. military bases sa rehiyon bangud bombahan ini sang Tehran.
“Studies have been conducted on opening other fronts in which the enemy has little experience and will be extremely vulnerable in them, and their activation will be carried out if the war situation continues and based on the observance of interests,” pahayag pa sini.
Pahayag pa niya, nagapakig-abyan ang Iran sa ila mga kaiping nga pungsod sa rehiyon, apang naga-establisar ang kasumpong sang military kag financial bases. Ini ang rason sang missile kag drone attacks sang Tehran sa ila Gulf neighbors halin sa nagligad pa nga 13 ka adlaw.
Dugang niya: “Some military bases were used [in the ongoing U.S.-Israeli attack] and naturally, as we had explicitly warned, we simply attacked those bases without attacking those countries. From now on, we will inevitably continue to do so, although we still believe in the need for friendship between ourselves and our neighbors. These countries must make their duty clear to the invaders of our beloved homeland and the murderers of our people. I recommend that they close those bases as soon as possible; because they must have realized by now that the claim of establishing security and peace by America was nothing more than a lie.”
Nagpaandam man ini nga buksan ang “other fronts” sa gyera kun magpadayon sa pagpamomba ang US kag Israel.
Una na nagpaandam ang US kag Israel nga puntariyahon nila ang bag-o nga Supreme Leader kag indi ini magdugay sa iya posisyon.#
